ពិធីសម្ពោធដាក់ឲ្យប្រើប្រាស់ជាផ្លូវការនូវសាលាឆាន់ និងសមិទិ្ធផលនានានៅក្នុងវត្តឧត្តមគិរីព្រឹក្សា ដែលមានទីតាំងស្ថិតនៅក្នុងភូមិថ្នល់កែង ឃុំប្រាំបីមុម ស្រុកថ្ពង ខេត្តកំពង់ស្ពឺ។

នាព្រឹកថ្ងៃទី១៩ ខែឧសភា ឆ្នាំ២០២២ ក្រុមហ៊ុន អ៊ី ឆែ គ្រុប​ និងរដ្ឋបាលស្រុកថ្ពង បានប្រារព្ធពិធីសម្ពោធដាក់ឲ្យប្រើប្រាស់ជាផ្លូវការនូវសាលាឆាន់និងសមិទិ្ធផលនានានៅក្នុងវត្តឧត្តមគិរីព្រឹក្សា ដែលមានទីតាំងស្ថិតនៅក្នុងភូមិថ្នល់កែង ឃុំប្រាំបីមុម ស្រុកថ្ពង ខេត្តកំពង់ស្ពឺ ក្រោមអធិបតីភាព​ដ៏ខ្ពង់ខ្ពស់ លោកឧកញ៉ា អគ្គនាយកក្រុមហ៊ុន អុី ឆែ គ្រុប និងលោកអភិបាល នៃគណៈអភិបាលស្រុកថ្ពង ខេត្តកំពង់ស្ពឺ ។

ក្រុមហ៊ុន អ៊ី ឆែ គ្រុប ពិតជាមានក្តីសោមនស្សរីករាយណាស់ ដែលបានរួមចំណែកក្នុងការសាងសង់សាលាឆាន់ថ្មីដល់វត្តឧត្តមគិរីព្រឹក្សា ក្នុងគោលបំណងដើម្បីជាទីសក្ការៈបូជាសម្រាប់ពុទ្ធបរិស័ទ ដែលជាប្រយោជន៍ក្នុងវិស័យព្រះពុទ្ធសាសនា និងជាប្រយោជន៍ដល់សង្គមជាតិ។ លើសពីនេះ យើងក៏បានចែកអំណោយសប្បុរសធម៌ជូនដល់ជនចាស់ជរា និងសិស្សានុសិស្សរស់នៅក្នុងតំបន់នោះប្រមាណជាង ៤០០នាក់ ដើម្បីជួយសម្រួលដល់ការរស់នៅរបស់ប្រជាពលរដ្ឋដែលកំពុងតែជួបប្រទះការខ្វះខាតឲ្យមានភាពប្រសើរឡើងផងដែរ។ អំណោយដែលផ្តល់ជូនមានដូចជា សម្ភារប្រើប្រាស់ (មុង ភួយ កន្ទេល ក្រមា សារុង) សម្ភារសិក្សា (កាបូបស្ពាយ សៀវភៅ ក្តារឈ្នួន ប៊ិច ខ្មៅដៃ) និងគ្រឿងឧបភោគបរិភោគ (មី ត្រីខកំប៉ុង ទឹកផ្លែឈើ និងទឹកសុទ្ធ)។

យើងខ្ញុំក៏សូមថែ្លងអំណរគុណយ៉ាងជ្រាលជ្រៅដល់អាជ្ញាធរគ្រប់លំដាប់ថ្នាក់នៅក្នុងស្រុកថ្ពងខេត្តកំពង់ស្ពឺ ដែលបានអនុញ្ញាត និងជួយសម្រួលដល់ការរៀបចំពិធីនេះឲ្យប្រព្រឹត្តទៅបានយ៉ាងរលូន និងជោគជ័យ។

ក្រុមហ៊ុន អ៊ី ឆែ គ្រុប កសាងអនាគតជាមួយអ្នក!